Се намалуваат шансите Кристијано Роналдо и следната сезона да остане во Манчестер Јунајтед, а како што во моментов стојат работите, Португалецот најверојатно кариерата ќе ја продолжи во Челси.
Како што пренесуваат светските медиуми, клубот од Лондон, кој летово доби нови сопственици по заминувањето на Роман Абрамович, е експлицитен во желбата да го доведе еден од најдобрите фудбалери на денешницата и е подготвен да плати 15 милиони евра за него.
Тоа се, горе-долу, парите за кои Манчестер е подготвен да го ослободи 35-годишниот фудбалер, кој поради, како што се наведува, „семејни причини“ не се појави на прозивката за претстојната сезона.
Сепак, медиумите на Островот со денови, па дури и недели пишуваат дека Роналдо не сака да остане во Јунајтед, бидејќи пред сѐ е незадоволен од тоа што клубот нема да игра во Лигата на шампионите, туку само во Лигата на Европа, а од друга страна не е задоволен од квалитетот на екипата за наредната сезона.
Ова може да го искористи Челси, кој има сѐ што ќе посака Португалецот - квалитетен тим, многу пари и големи амбиции.
Премиер лигата започнува на 5 август.
