Нуклеарната електрана Чернобил во целост е исклучена од електричната мрежа среде делувањето на руските напади, соопшти операторот Укренерго.
„Поради воените акции на руските окупатори нуклеарната електрана во Чернобил во целост е исклучена од електричната мрежа. Нуклеарната станица нема напојување. Воените акции се во тек, така што нема можност за поправка“, соопштија од Укренерго, пренесе Интерфакс Украина.
Украинските функционери велат дека не знаат колкаво е нивото на радијација во Чернобил откако руските сили го зазедоа во текот на инвазијата, пишува Sky News.
Украинската државна нуклеарна компанија соопшти дека радиоактивни материи можат да бидат испуштени од изгасената нуклеарна електрана Чернобил бидејќи не може да се лади истрошеното нуклеарно гориво откако е прекинато напојувањето.
Оневозможено е да се направи поправка на приклучокот и повторно напојување на електраната заземена од руските трупи, бидејќи на тоа подрачје се водат борби.
