Овие парламентарни избори минаа во мирна, фер и демократска атмосфера и се уште еден доказ, како за демократската свест на граѓаните, така и за капацитетите на институциите, пред сѐ на МВР, кои крајно одговорно бескомпромисно неселективно и согласно законски надлежности постапуваше, оцени вечерва министерот за внатрешни работи Наќе Чулев.
Тој додаде дека на ваков начин МВР претставувало силен гарант за спроведување на граѓанската волја, но, како што рече, и за почитување на словото на уставот и на законите.
Притоа како што рече, биле преземени и мерки за заштита на здравјето на граѓаните со оглед на тоа што овие избори се одржаа во услови на пандемија предизвикана од коронавирусот.
Тој изрази благодарност до сите вклучени во изборниот процес за тоа што тој поминал во демократска и фер атмосфера.
Министерот за внатрешни работи на прес-конференцијата информираше и за одредени неправилности и за мерки кои биле преземени и постапки кои биле покренати.
„Околу изборниот процес, дозволете да информирам дека до 20 часот во текот на денешниот ден беа евидентирани 151 настан од кои 31 не се потврдени најави, додека пак констатирани се 9 прекршоци и тоа 3 по чл 16 лажно пријавување настан, три прекршоци од изборен законик и еден од чл. 4 и чл. 14. Заради расчистување настани приведени се 8 лица од кои 4 за фотографирање гласачко ливче, 3 за сторени прекршоци и едно лице со две гласачки ливчиња“, информираше Чулев и додаде дека по сектори, најмногу нерегуларности биле регистрирани во Струмица - 38 настани, 31 во Скопје и Штип, во Битола 23 настани, во Куманово 14, во Тетово, 6, во Велес 5 и 3 во Охрид.