Земјотресот со интензитет од 6,3 степени според Рихтеровата скала што синоќа ги погоди југоисточните острови во Егејското Море предизвика цунами со висина од десет метри во морето покрај турскиот град Бодрум.
Во Бодрум и Датча се повредени 90 лица, но никој не е во критична состојба. Земјотресот предизвика паника меѓу жителите, кои ја поминале ноќта надвор од своите домови.
Голем број туристи си заминаа од регионот бидејќи стравуваат од нови земјотреси.
Сеизмолозите наведоа дека не се очекува поголемо цунами.
Според информациите што ги објави Агенцијата за управување со кризи на Република Турција (АФАД), ноќеска, неколку минути по полноќ, во заливот Гокова (провинцијата Мугла), каде што се наоѓа туристичкиот град Бодрум, местото го зафатиле серија од над 45 земјотреси, од кои најсилниот бил со јачина од 6,3 степени според Рихтер.
Епицентарот на земјотресот бил во непосредна близина на турскиот град Бодрум и грчкиот остров Кос. Според досегашните сознанија, на грчкиот остров Кос има две жртви, истовремено има и повеќе повредени, а воедно земјотресот предизвикал сериозна материјална штета.
Нема повредени македонски државјани во земјотресите.