Младинскиот културен центар во Скопје соопшти дека вечерва вечерва и утре (5 и 6 февруари) со почеток од 20 часот во МКЦ ќе се изведе театарската претстава „Да го поздравиш и да ми го бациш“, во продукција на здружението АРТОПИЈА.
Од МКЦ нагласуваат дека настаните ќе бидат реализирани по соодветен протокол, запазувајќи ги препорачаните мерки за заштита.
Билетите се достапни на билетарница во МКЦ и online преку bileti.mkc.mk. Претставата не е наменета за лица под 16 години.
„Да го поздравиш и да ми го бациш“ е документарна претстава, авторско дело на четворица актери и еден режисер. Ја раскажува приказната за растењето, за соништата за себеостварувањето и за соочувањето со општествените механизми на функционирање.
Темите што се отвораат во претставата (уметноста во себе, надежите, стравовите, борбите за остварување на креативниот потенцијал…) се одраз на личните искуства на актерите и зборуваат за борбата за индивидуална слобода.
Каков треба да биде театарот денес? Кое е неговото место во опшетството? Кое е местото на младинците во општетсвото во кое живееме? Претставата зборува и за: емотивната слика на индивидуалниот внатрешен конфликт помеѓу интутитивното и рационалното, за слика за вакуум просторот помеѓу „каков сакаме да биде животот“ и „каков животот навистина е“ итн. Севкупно, актерите на сцена поставуваат прашања и отворат дилеми барајќи начин да ги одговорат.
Играат: Бојан Кирковски, Наташа Петровиќ, Ненад Митевски и Симона Спировска Костовска. Режијата е на Билјана Радиноска.
