Легендарното трио во средниот ред на Реал Мадрид се распадна кога Касемиро реши да ја прифати понудата на Манчестер Јунајтед. Тоа беше во август годинава. Лука Модриќ и Тони Крос останаа без добро координирано обезбедување зад себе, а Реал следниот натпревар би можел да го започне без преостанатите двајца или барем еден од нив.
Marca пишува за Крос како нешто поинаков фудбалер. На играчот кој на 31 година се прости од германската репрезентација со која беше светски првак во 2014 година, за да може повеќе време да поминува со семејството и повеќе да се концентрира на Реал Мадрид. Сега како 32-годишник сè уште размислува дали воопшто ќе остане во мадридскиот гигант.
Анчелоти е оптимист
Крос е договорно врзан за Реал само до крајот на актуелната сезона, а како месец кога треба да се донесе одлука за неговата иднина се споменува февруари. Тренерот на тимот Карло Анчелоти е оптимист за останување на Крос во клубот, но Крос сè уште не ја соопштил својата одлука и нема гаранции дека ќе го продолжи договорот.
Marca го воведува Лука Модриќ во приказната и го наведува како еклатантен пример за спортска долговечност и пишува дека капитенот на хрватската репрезентација е 37-годишник кој „се покажа како еден од најдобрите играчи од средниот ред во светот на Светското првенство во Катар, а тандемот што го формира со Крос во Мадрид веќе влезе во легендата“.
Одлуката е на Крос
„Дури и доаѓањата и консолидацијата на Валверде, Камавинга или Чуамени не го променија статусот на Крос и Модриќ. Наместо тоа, младоста и силата на новите играчи ни овозможија да видиме одлични верзии на двајцата. Ова му овозможува на Анчелоти да им даде малку повеќе одмор“, пишува Marca.
Како и Крос, Модриќ е договорно обврзан со Реал само до крајот на сезоната. Шпанските медиуми веќе пишуваа дека Реал е подготвен да му понуди нов договор. Модриќ изјави дека неговата намера е да се пензионира во Реал, за кој сезонава одигра 18 натпревари со пет гола и две асистенции.
Доколку се покаже дека тоа што го пишуваат шпанските медиуми е вистина и Реал му понуди на Модриќ продолжување на договорот за една година, а тој го прифати, одлуката за раскинувањето на легендарниот двоец на Реал ќе остане на Крос.
