Златан Ибрахимовиќ денес требало да ги брани боите на Наполи. Сѐ било наредено, но на крајот тогашниот тренер Џенаро Гатузо го прекинал трансферот.
Кога во ноември 2019 Ибра објави дека го напушта Лос Анџелес Галакси, неколку клубови се бореа за неговиот потпис. Најсимпатична беше борбата на „малата“ Болоња која со Синиша Михајловиќ на клупата играше на картата на Србинот, но не успеа да го убеди Златан. Наголемо се шпекулираше дека ќе заврши во Милан, што на крајот и се случи, но никој не знаеше дека Ибра всушност бил веќе преселен во Наполи. Имал потпишано договор и ги договорил сите детали со клубот од Неапол, за на крајот трансферот да пропадне и тоа поради тогаш новоназначениот Џенаро Гатузо, кој оценил дека не му е потребен.
„Имавме сѐ потпишано со Златан, но тогаш Анчелоти доби отказ и беше заменет со Гатузо. Тој (Гатузо) ми се јави и ми рече: 'Верувај, не ни треба Ибрахимовиќ'. И јас му поверував“, вели претседателот на Наполи, Аурелио Де Лаурентис говорејќи за DAZN.
Карло Анчелоти доби отказ од Наполи на 10 декември 2019 поради слаби резултати, а веќе наредниот ден беше назначен Гатузо на клупата. Откако трансферот во Наполи не му се оствари, Ибра потпиша за Милан на 27 декември и ден денес настапува за овој клуб.
Гатузо без Ибра заврши дури на 7. место таа сезона, додека Швеѓанецот постигна 10 гола за Милан. Наполи не успеа да се пласира во Лигата на шампионите ниту наредната сезона кога заврши 5-ти по што Гатузо веднаш доби отказ. Милан заврши со втор со Ибра кој постигна 15 голови.
