Кошаркарите на Лос Анџелес Клиперс израмнија на 2-2 во партии откако синоќа со 116:111 славеа на гости кај Далас Маверикс.
Гостите од Лос Анџелес водеа речиси во текот на целиот натпревар откако по почетните 8:7 на Далас го презедоа водството и во втората четвртина во еден момент имаа и дури +31 поен предност.
Далас во третата четвртина успеа да ја намали разликата дури и на 2 поена, за во средината на четвртата да израмни на 98:98 и 100:100 и дури и да поведе со еден поен (105:104).
Сепак, пресвртот краеше само еден напад бидејќи гостите повторно поведоа и предноста ја одржуваа до самиот крај благодарение на расположениот Џејмс Харден, кој погодуваше од секаква позиција. Харден натпреварот го заврши со скор од 33 поени, 6 скока и 7 асистенции.
Сличен скор имаше неговиот соиграч Пол Џорџ со 33 поени, 6 скока и 8 асистенции.
Кај домашните најефикасен беше Кајри Ирвинг со 40 поени, 7 скока и 5 асистенции, додека Лука Дончиќ запиша трипл-дабл со 29 поени и по 10 скокови и асистенции. Но, Дончиќ беше очаен во шутот за 3 поени реализирајќи само една тројка од 9 обиди, и тоа во последната четвртина.
Минесота Тимбервулвс е првата екипа која обезбеди место во конференциското полуфинале откако и по четврти пат го среди Феникс Санс. Ноќеска Ентони Едвардс ја предводеше Минесота со 40 поени, 9 скока и 6 асистенции, а поддршка имаше од Карл-Ентони Таунс со дабл-дабл од 28 поени и 10 скока, Џејден МекДениелс со 18 поени и Мајк Конли со 10 поени и 7 асистенции.
Кај елиминираниот Феникс пирови сеа 49-те поени на Девин Букер, кој поддршка имаше само од Кевин Дурент со 33 поени, 9 скока и 5 асистенции. Никој друг од редовите на Санс не ја мина границата од 10 поени.
Резултати:
Филаделфија 76ерс - Њујорк Никс 92:97 (1-3)
Далас Маверикс - Лос Анџелес Клиперс 111:116 (2-2)
Индијана Пејсерс - Милвоки Бакс 126:113 (3-1)
Феникс Санс - Минесота Тимбервулвс 116:122 (0-4)
