Свет

Демонстрации во Атина: Американци – убијци!

16. април 2018 - 16:50 | А.С.

Група приврзаници на Комунистичката партија на Грција се обидоа да ја срушат статуата на поранешниот американски претседател Хари Труман на протестите во центарот на Атина против американската воена интервенција во Сирија.

Демонстрантите се судрија со полицијата која употреби солзавец за да ги растера, објави „Ројтерс“, повикувајќи се на изјави на очевидци.

Најмалку тројца демонстранти се повредени, а според новинската агенција АНА, најмалку две лица се приведени. Судирите избија кај статуата на Хари Труман.

Во протестите учествувале студенти и ученици кои марширале кон американската амбасада во Атина.

Во главниот град на Грција веќе трет ден се организираат протести против воената интервенција на САД во Сирија, на кои учествуваат по 6.000-7.000 луѓе и на кои беше запалено и американското знаме.

Протестите ги организира грчката Комунистичка партија.

Демонстрантите е собраа на централниот плоштад Синтагма во Атина од каде продолжија кон американската амбасада, извикувајќи пароли против САД.

На улицата пред амбасадата со црвена боја испишаа „Американци-убијци на луѓе“, а потоа неуспешно се обидуваа да фрлат боја во дворот на амбасадата.

Коментирај