Како што се наближува датумот кога новиот филм од франшизата „James Bond“, така се забрзува и потрагата по нов режисер кој ќе внесе нов живот во овој серијал. Сепак, студиото MGM изгледа има на ум едно име кое се смета како фаворит да ја преземе режисерската палка од Сем Мендес.
Оскаровецот Дени Бојл се очекува да потпише договор со студиото Metro-Goldwyn-Mayer за да ја преземе режисерската должност во франшизата за култниот британски таен агент.
Дени Бојл е почитуван и критички признат британски режисер, кој зад себе има проекти како „28 Days Later“, „Trainspotting“ и „Slumdog Millionaire“, за кој и доби Оскар. Освен филмската должност, тој беше режисер и на церемонијата на отворањето на Летните олимписки игри во Лондон во 2012 година.
Минатото лето, студиото MGM одлучи дека 25-от филм за Џејмс Бонд ќе ја има неговата премиера на 8 ноември 2019 година, а во тој момент не беше сигурно ниту дали Даниел Крег ќе се врати во улогата на познатиот таен агент 007. Како што времето одминува сѐ повеќе, одбирањето на режисер за новиот дел од франшизата стана задача која тежи на грбот на студиото, па изборот на Дени Бојл, иако не конечен, е охрабрувачки за љубителите на филмот.
Бојл често работи на филмови кои се од британска продукција, но зад себе има и неколку холивудски блокбастери, па се очекува добро да се снајде во новата работна задача. Тој би можел да донесе нов изглед и свежина во филмската франшиза која беше критикувана по последниот нејзин дел дека премногу „оди на сигурно“.
