Макароните се храна која одлично оди со сосови од месо, риба и зеленчук, но дали некогаш сте ги пробале во блага верзиjа?
Не, овој рецепт со паста не е воопшто италијански, но блиску. Станува збор за рецепт од градот Стон на хрватскиот полуостров Пељешац во Далмација.
Еден од заштитните знаци на стонската кујна и Пељешац е токму стонската торта, која се прави од макарони или, како што се нарекуваат таму, макарула.
Оваа торта која спаѓа во самиот врв на десертите се подготвува во посебни пригоди, а ние ви го пренесуваме рецептот за да пробате да ја направите сами.
Потребни состојки:
За филот:
- ½ кг макарони
- 400 гр шеќер
- 100 гр чоколадо
- 300 гр бадеми
- 200 гр ореви
- 250 гр путер
- 10 јајца
- ванилин шеќер
- цимет
- лимон
- рум
- маслиново масло
За тестото:
- 400 гр брашно
- 2 јајца
- маслиново масло
- сол
Подготовка:
Макароните се варат во зовриена вода и се „ладат“. Се преливаат со сок од лимон, рум и маслиново масло.
Се замесува тесто од брашно, јајца, маслиново масло (кое може да се замени со путер) и сол и се остава малку да отстои.
Тестото се оптегнува во тенок лист. Калапот (садот за печење) намачкајте го со маслиново масло (или путер) и сето тоа прелијте го со лист тесто кој треба да се протега десетина сантиметри преку работ на калапот.
Дното од калапот се посипува со филот (мешавина од рендано чоколадо, шеќер, мелени ореви и бадеми, кора од лимон, ванилин шеќер и цимет), потоа доаѓаат сварените макарони, филот повторно се посипува, парчиња путер се фрлаат и сѐ се покрива со изматени јајца. Овој процес на редење се повторува три до четири пати додека не се потроши предвидената количина намирници.
Филот се покрива со вишокот тесто што поминало преку рабовите. Колачот лесно се притиска со рака за да се израмни и тестото да се залепи за филот и калапот. Површината се премачкува со путер.
Стонската торта се пече 50 минути на температура од 175 степени.
Изладената торта се превртува при вадењето од калапот така што долниот дел ќе стане горен. Одозгора се става ванилин шеќер и потоа се сече.
