На берзите во Јапонија и Австралија цените на акциите пораснаа, како и вчера на Волстрит, додека на другите пазари се тргува внимателно бидејќи нема вести за охрабрување на инвеститорите.
Индексот MSCI на азиско-пацифичкиот регион беше околу 7 часа речиси непроменет во однос на вчерашниот ден. Во исто време, јапонскиот индекс Никеи скокна за 1,6 отсто, а цените на акциите во Австралија исто така силно пораснаа, околу 1 отсто. Во Шангај, Хонг Конг и Јужна Кореја тие паднаа меѓу 0,2 и 0,6 отсто.
Вчера цените на акциите значително пораснаа на кинеските берзи, откако кинеската влада соопшти дека во вториот квартал растот на бруто домашниот производ (БДП) ќе биде повисок од првиот и дека растот оваа година би можел да биде околу целното ниво од 5 проценти. Сепак, инвеститорите утринава ги потресе фактот што вкупниот профит на кинеските индустриски компании во првите пет месеци од оваа година падна за речиси 19 отсто во споредба со истиот период лани.
Додуша, ова е помал пад во однос на претходните месеци, но сепак не покажува дека растот на кинеската економија значително се забрзува. Освен тоа, медиумите пишуваат дека американските власти би можеле да воведат нови ограничувања за извоз на чипови со вештачка интелигенција во кинески компании.
Во Јапонија и Австралија, пак, цените на акциите значително пораснаа, по вчерашниот раст на Волстрит, кога Dow Jones зајакна 0,6 отсто, додека S&P 500 порасна за 1,15 отсто, а Nasdaq индексот за 1,65 отсто.
А на девизните пазари падна вредноста на доларот во однос на кошницата со валути. Индексот на доларот, кој ја покажува вредноста на американскиот долар во однос на другите шест најважни светски валути, утринава се движи околу 102,55 поени, додека вчера во ова време изнесуваше 102,77 поени.
Истовремено, курсот на доларот во однос на јапонската валута порасна од вчерашните 143,45 на 143,80 јени. Но, американската валута ослабе во однос на европската, па цената на еврото достигна 1,0950 долари, додека вчера во овој момент беше 1,0905 долари.
Цените на нафтата, пак, повратија дел од вчерашните загуби. Цената на барелот на лондонскиот пазар утрово зајакна за 0,37 отсто, на 72,50 долари, додека на американскиот пазар цената на барелот порасна за 0,32 отсто, на 67,90 долари.
