Српскиот стратег и во наредните две години ќе го предводи клубот од Дебар Маало откако управата реши да ја продолжи соработката.
Откако Ратко Достаниќ седна на клупата на Работнички, тимот живна. Почна да реди победи, да гази сѐ пред себе и само коронавирусот успеа да ја запре победничката серија на „Романтичарите“.
Оттаму, воопшто не е чудно што клупската управа реши да му понуди двегодишен договор на тренерот чии идеи очигледно одлично беа прифатени од играчите кои предтоа изгледаа како сосема друг тим.
„По предвремениот прекин на сезоната, Работнички веќе размислува за следните предизвици. Имавме разговор со шефот на стручниот штаб Ратко Достаниќ и договоривме нова двегодишна соработка. Клубот има стратегија за форсирање на млади фудбалери, а тренерот има желба да се вклопи во една таква концепција и со врвна работа и максимален професионализам кои се карактеристики на Ратко Достаниќ да стигнеме и до позитивни резултати“, вели за клупската веб-страница првиот човек на клубот, Драган Поповски.
Одличните резултати на Србинот го кренаа Работнички од последното место до осмото со 3 бода заостанување зад 4. место кое веројатно ќе води во квалификациите од Лигата Европа.
Достаниќ се наоѓа во Србија и поради затворените граници не беше во можност да дојде во Скопје и да ги почне подготовките за продолжувањето на сезоната која сега дефинитивно се прекина, па се очекува српскиот стратег да се врати во текот на летото, откако границите ќе се отворат.