Дрво на парите е многу издржлива билка која не бара многу вода, но потребни и се неколку часа сонце дневно за да опстане. Може да живее и до 40 години, а кога ќе биде доволно зрела може да има мали бели или розови цветови во облик на ѕвезда во текот на зимата.
Станува збор за красула, дрво на парите. Името го добила поради фенг шуи верувањата дека носи пари на тој кој ја поседува. Некои тврдат дека оваа билка, исто така, носи среќа и позитивна енергија. Се верува дека е најдобро да ја чувате покрај влезната врата. Во Кина, красула има во многу канцеларии и ресторани, веднаш покрај вратата бидејќи се верува дека така ќе доведе до повеќе клиенти и посетители.
Одлична е за подарок, многу е издржлива и може да опстане и во надворешни услови само ако има доволно топлина и сонце. Не смее да биде директно на сонце за да не се попарат листовите. Не е потребно често залевање, премногу вода може да доведе до опаѓање на листовите. Преку зима е доволно да ја полевате еднаш во три недели.
Најдобро успева на светло место, но не под директно сонце. Доволни се неколку часа на сонце за да биде среќна. Никако не смее да биде на температура под 10 степени. По потреба, се пресадува на пролет или во текот на летото.