За оваа земја измеѓу Кавказ и Црното Море малкумина имаат слушнато, а меѓу нив се и оние постарите. Причината е што оваа држава не може да се најде на ниту една карта - бидејќи ја нема.
Некогашната автономна советска социјалистичка република во рамките на границите на Грузија, по име Абхазија, прогласи независност во 1993 година. Ја признаа Русија, Никарагва, Венецуела, Науру, Јужна Осетија и Приднестровие, последниве две непризнати како и неа.
Меѓународните организации како ОН, Европската комисија, ОБСЕ, НАТО, Светската трговска организација, поголемиот дел на Европа како и речиси сите суверени држави во светот, ја признаваат Абхазија како дел на Грузија.
Главен град на Абхазија е Аква, во превод едноставно - вода, но Русите го викаат Сухум, додека Грузијците Сухуми, приморски град сместен на источниот брег на Црното Море. За време на поранешниот СССР Абхазија била омилено летувалиште и одморалиште на вљубениците во преубавата природа, а Сухими исто така бил задолжителна станица. Остатоци од римски градби, тврдини и дворци, потоа Беслетскиот мост од 12 век и ботаничката градина со над 5 илјади видови од 1840 година, се само некои од атракциите на овој град.
Околу 70 километри од Сухуми се наоѓа планинското езеро Рица. Освен тоа што е само по себе глетка за паметење, и самата вожња до него преку Кавказот е прав спектакл. Цело време се поминува низ густа шума, а покрај водопадите туристите доаѓаат со автомобили или автобуси сѐ до 950 метри надморска височина каде се наоѓа езерото, опколено со планини високи и до 3.500 метри. Таму и Јосиф Сталин имал еден од своите езерски летниковци.
