НБА ѕвездата Кевин Дурент тргна по стапките на Мајкл Џордан и Леброн Џејмс. Асот на Феникс Санс потпиша доживотен договор со производителот на спортска опрема Nike.
Соработката на Дурент со Nike датира од 2007 година, а досега имаат издадено 15 различни оригинални патики.
„Кога првпат потпишав со Nike, никогаш не можев да сонувам до каде ќе оди нашето партнерство. Направивме одлична работа креативно и филантропски. Заедно го прошетавме светот и создадовме работа која ќе трае вечно. Возбуден од она што го носи иднината. Голема чест за мене е што сум во ова одбрано друштво“, рече Дурент.
Доживотната соработка вклучува обувки и облека, а Nike и Дурент ќе продолжат да соработуваат на отворање нови терени во заедниците ширум светот преку „Фондацијата Дурент“ и програмата за развој на млади спортисти на Кевин наречена, „Тим Дурент“.
Финансиските детали од договорот не се обелоденети, единствено е познато дека Дурант барем до неодамна инкасирал околу 40.000.000 долари на име спонзорски договори, според Forbes.
Двократниот НБА шампион во февруари се пресели од Бруклин во Феникс, а со Санс го елиминира Лос Анџелес Клиперс во првото коло од плеј-офот и закажа меч со Нагетс во полуфиналето на Западната конференција.
