Филипинскиот претседател Родриго Дутерте ја осуди руската инвазија во Украина и го обвини рускиот претседател Владимир Путин за убиства на невини цивили во таа земја.
Дутерте инвазијата на Украина ја нарече „водење војна против суверена нација“, а не „посебна воена операција“ како што Путин ја нарекува.
„Многумина велат дека јас и Путин сме убијци. Јас веќе долго време им зборувам на Филипинците дека навистина убивам луѓе. Но, јас убивам криминалци, не убивам деца и старци“, вели Дутерте. „Ние сме два различни света“, смета тој.
Филипинскиот лидер прв пат ја осуди руската инвазија на Украина на телевизиски неделен состанок со клучните функционери во владата кога ја обвини тримесечната војна за раст на светската цена на нафтата, поради што се погодени многу економии, вклучително и на Филипини.
Тој изрази загриженост поради стабилноста за снабдување со нафта во земјата додека војната во Украина продолжува да беснее и да предизвикува глобална нестабилност.