Европската комисија соопшти дека најавата за значително намалување на снабдувањето со вакцини на AstraZeneca на пазарот на ЕУ е „неприфатлива“ и бара од компанијата да одговори колку дози се произведени досега и на кого се доставени.
Европската комесарка за здравство Стела Кирјакидес изјави дека одговорите на AstraZeneca на поставените прашања „досега не биле задоволителни“, и оти „вечерва повторно“ ќе разговараат со претставниците на компанијата.
– ЕУ сака порачаните и веќе платени вакцини да бидат доставени во најкус можен рок, а договорот да се почитува целосно, истакна Кирјакидес.
Таа додаде дека ЕК денеска предложи механизам за транспарентност на извозот на вакцини.
– Европската Унија го поддржа забрзаниот развој и производство на неколку вакцини против COVID-19 со 2,7 милијарди евра. Ние сакаме јасност на трансакциите и целосна транспарентност на извозот на вакцини од ЕУ, рече Кирјакидес.
ЕК најави дека отсега сите компании кои произведуваат вакцини против COVID-19 во ЕУ ќе треба однапред да ја известат ЕУ доколку сакаат да доставуваат вакцини во трети земји.
– ЕУ ќе стори сè што може за да ги заштити своите граѓани и нивните права, подвлече Кирјакидес.