Делови од Австралија, вклучително и Сиднеј, ја поминаа најтоплата ноќ во ноември, а температурите се очекува да останат високи и во текот на денешниот ден, поради што властите ги огласија алармите за предупредување од можни пожари.
Во Сиднеј, завчера температурите надминаа 40 Целзиусови степени, додека делови од западен Нов Јужен Велс, Јужна Австралија и северна Викторија се приближија до 45 степени.
Температурите денеска се очекува да надминат 40 степени, втор ден по ред, додека Заводот за метеорологија предвидува екстремен топлотен бран во траење од пет до шест дена за делови од северен Нов Јужен Велс и североисточен Квинсленд.
Австралија се соочува со потопло и подолго лето од вобичаено, а минатата сезона австралискиот премиер Скот Морисон го нарече „црно лето“ поради невообичаено долгите и интензивни пожари во кои изгореа скоро 12 милиони хектари и загинаа 33 лица и околу милијарда животни.
Руралното противпожарно одделение издаде предупредување за пожар за повеќето од источна и североисточна Нов Јужен Велс во неделата, со образложение дека постои „многу голема до сериозна опасност од пожар“, бидејќи врелите налети на ветерот ги влошуваат веќе сувите услови на терен.