Барселона и Реал одиграа 1:1 (0:0), во најголемото шпанско дерби и едно од најголемите во фудбалскиот свет. Дербито понуди малку од убавината на фудбалската игра, а бод на Реал му обезбеди Серхио Рамос во последната минута.
Барселона и Реал го одиграа 232-то дерби, 163-то во Примера, кое заврши без победник. Инаку ова беше 48-то реми, 33-то во првенството, во меѓусебните дуели во кои Реал е поуспешен (93:89), додека само во Примера тој скор изнесува 72:68.
Дербито кое со нетрпение го очекуваа фудбалските вљубеници не понуди ништо по што ќе биде запаметен. Здодевно прво полувреме, во кое двата тима немаа конкретна закана кон голманите Тер Штеген и Кејлор Навас.
[jw: https://www.youtube.com/watch?v=Sq1BePpWmbA]
Безидејно и здодевно делуваа тимовите и во вториот дел се до 58. минута кога Барселона речиси од ништо постигна гол.
Слободен удар изведе Нејмар, во срцето на петерецот Лукас Васкез го остави сам Луис Суарез кој со глава го совлада Навас.
[jw: https://www.youtube.com/watch?v=sVnpET78l7s]
По голот и влегувањето на Иниеста, Барселона беше многу поконкретна, а таквата игра не ја претвори во победа бидејќи Нејмар и Меси пропашија две чисти шанси.
Бразилецот во 68. минута со брилијантен потег го исфрли Карвахал од игра, си создаде зицер ситуација, но шутираше над голот.
Меси во 81. минута доби идеална топка од Иниеста, но неговиот удар заврши крај голот.
Првата вистинска шанса Реал ја имаше во 88. минута, но ударот на Роналдо со глава, Жорди Алба го изблокира.
Реал израмни во 90. минута преку Серхио Рамос, кој центаршутот на Модриќ го претвори во гол.
По 14. коло Реал ќе остане лидер со 34 бода, а Барселона има шест помалку од големиот ривал.
