Пратениците во Европскиот парламент во резолуцијата усвоена вчера повикаа да се санкционираат иранските функционери вклучени во убиството на младата Иранка Махса Амини.
Махса Амини, 22-годишна Курдка, почина на 16 септември во болница во Техеран, три дена откако беше уапсена поради „неправилно носење хиџаб“.
Пратениците ја повикаа ЕУ да ги санкционира убијците на младата Иранка
Европратениците ја осудија нејзината смрт и ја повикаа ЕУ да ги санкционира нејзините убијци и сите оние кои учествуваа во насилното задушување на протестот со повеќе жртви, соопшти Европскиот парламент.
Тие го повикаа Советот за човекови права на ОН да ги истражи последните случувања во Иран. Пратениците ги повикуваат и членките на ЕУ кои имаат дипломатски претставници во таа земја да ги координираат своите активности за заштита на борците за човекови права, особено борците за правата на жените и лицата со двојно државјанство на една од земјите-членки на ЕУ и Иран, се наведува во соопштението.
Пратениците, исто така, бараат од иранските власти веднаш и безусловно да ги ослободат сите лица кои се затворени исклучиво за мирно остварување на нивните права на слобода на изразување, здружување и мирно собирање, како и да ги отфрлат сите обвиненија против нив и сите други активисти за човекови права.
Санкции кон Иран
На 12 април 2011 година, ЕУ воведе санкции кон Иран поради сериозно кршење на човековите права. На 23 март 2012 година беа воведени дополнителни мерки, вклучително и ембарго за опрема што може да се користи за внатрешна репресија и за опрема што може да се користи за следење или пресретнување на интернет и телефонски комуникации на мобилни или фиксни мрежи. Овие санкции се во сила до 2023 година.
За состанокот на министрите за надворешни работи на ЕУ на 17 октомври би можело да се подготви нов пакет санкции. За негово усвојување потребна е едногласна одлука на сите членови.