Во петокот Европската комисија предложи увозот на руско злато да биде вклучен во новиот пакет санкции чија цел е дополнително слабеење на руската економија.
Извршната власт на ЕУ нема да ги смета новите предложени ограничувања за седма рунда санкции, против кои веќе се изјаснија многу земји-членки, туку како пакет за „одржување и прилагодување“.
Тоа, сепак, ќе воведе ново ембарго, овојпат на руското злато.
Скапоцениот метал е најголемиот извоз на Русија по енергијата и вредел повеќе од 18,5 милијарди евра во 2020 година.
Според Опсерваторијата за економска сложеност, која ги собира податоците за меѓународната трговија, огромното мнозинство од руското злато отишло во Велика Британија таа година, а преостанатите 2 милијарди евра биле поделени меѓу Швајцарија, Казахстан, Турција и Индија.
За ЕУ, причината за златното ембарго е усогласувањето со нејзините главни меѓународни партнери како што беше ветено на минатомесечниот состанок на Г7 во Германија. Таква санкција веќе воведоа САД, Велика Британија и Јапонија.
Исто така, треба да предизвика значителна штета на руската елита и економија, бидејќи благородниот метал во последните месеци стана безбедно засолниште за олигарсите кои купуваат златни шипки во обид да го ублажат влијанието на западните санкции врз Русија.