Поради саботното финале на Евровизија, која се одржува во Англија, на ФА од полицијата ѝ било наредено тој ден да не организира натпревари во овој град.
Манчестер Сити во сабота требаше да му гостува на Евертон во Ливерпул, но ќе мора овој натпревар да го игра ден подоцна, односно в недела.
Ова е по наредба на локалната Мерсисајд полиција која на ФА ѝ наложила да не организира фудбалски натпревари во градот Ливерпул бидејќи таму вечерта ќе се одржи финалето на овогодишната Евровизија. Причината е за да не се создаваат гужви низ градот бидејќи ќе има недостаток на полицајци за да се контролира сообраќајот.
Така, Еверон сега ќе го пречека Манчестер Сити в недела од 15 часот, што значи дека за полуфиналниот реванш од Лигата на шампионите против Реал Мадрид, закажан за в среда од 21 часот, „Граѓаните“ ќе имаат еден ден помалку за одмор.
Сити избегна пораз во Мадрид во вторникот и одигра 1:1, па на реваншот ќе треба да победи за да се избори за големото финале каде би играл со победникот од миланското дерби Интер - Милан („Нераѕурите“ имаат 2:0 по првиот натпревар).
За разлкика од Сити, Реал Мадрид својот лигашки натпревар го игра в сабота од 21 часот против Хетафе и ќе има една ноќ одмор повеќе од англискиот шампион.
Евровизија годинава се организира во Англија бидејќи минатогодишниот победник Украина поради војната со Русија не е во можност да го организира настанот.
