Најновиот филм во франшизата Fast & Furoius на Universal, насловен Fast X, заработи 318,9 милиони долари во првиот викенд откако почна да игра во киносалите ширум светот.
Филмот заработи 67,5 милиони долари во Северна Америка, што е помалку од очекуваното за таа област, но успеа да го надомести глобално, пишува The Hollywood Reporter.
Единствениот филм кој имаше подобар прв викенд оваа година беше Super Mario Bros. Movie, кој заработи 377 милиони долари во првиот викенд.
Fast X го симна од врвот Guardians of the Galaxy Vol. 3 на Disney и со тоа стана најгледаниот филм во кината во моментов. И покрај ова, Guardians of the Galaxy викендов имаше импресивна добивка - 32 милиони во САД и 48,8 милиони на глобално ниво, така што досега има заработено вкупно 659,1 милиони долари.
Франшизата Fast & Furoius е една од ретките што е добро прифатена во Кина, поради што последниот дел таму заработи 78,3 милиони долари. Друга територија каде што филмот доживеа успех е Мексико, каде заработи 16,7 милиони долари во првиот викенд.
CinemaScore на десеттото продолжение на серијалот му даде оценка Б+, исто како и на филмот Fast and Furious 9, кој излезе во 2021 година и чија премиера беше погодена од пандемијата на коронавирус.
Од сите филмови во франшизата, Fast & Furious 7 имаше најсолиден премиерен викенд во Северна Америка, со заработка од 148 милиони долари.
Fast X го режираше Луис Летериер, режисер на Masters of Illusion и The Incredible Hulk.
Вин Дизел ја предводи ол-стар актерската екипа која ги вклучува Мишел Родригес, Тајрис Гибсон, Лудакрис, Сунг Канг и Џордан Брустер. Нови лица во филмот се Џејсон Момоа, Бри Ларсон и Рита Морено, која ја игра бабата на ликот на Дизел.
Во филмот играат и Натали Емануел, Џон Сена, Џејсон Стејтам, Алан Ричсон, Даниела Мелкиор, Скот Иствуд, Хелен Мирен и Шарлиз Терон.
