Ентони Фаучи е директор на американскиот Национален институт за алергии и инфективни болести скоро 40 години и има сведочено на различни епидемии. Во ексклузивно интервју за National Geographic тој вели дека нема научни докази за тоа дека коронавирусот е создаден во кинеска лабораторија.
Со ова тврдење Фаучи ги замолчи дискусиите меѓу политичарите и нивните тврдења дека вирусот „избегал“ или потекнува од лабораторијата во Вухан. Фаучи е еден од најзначајните американски експерти за инфективни болести и значаен член на групи во борба против коронавирсуот.
Тој во интервјуто објасни дека не постои научна основа за теоријата дека вирусот е создаден од човек, во лабораториски услови или дека вирусот потекнува од лабораторија откако е доведен од дивина.
„Ако ја набљудувате еволуцијата на вируси кај лилјаците, научните докази се многу силни. Вирусот не би можел да биде вештачки, ниту постои сомнеж дека со него е манипулирано. Сè за постепената еволуција во текот на времето силно укажува на тоа дека вирусот се развил во природа и преминал од животни на луѓе“, вели Фаучи во интервју за National Geographic.
На основа на научни докази, вели тој, исто така не може да се тврди дека вирусот е пронајден во дивина, пренесен во лабораторија, а потоа случајно „избегал“ оттаму.
Теоријата дека вирусот се појавил во лабораторија во Вухан во Кина неодамна во изјави ја „подгреаја“ американскиот претседател Доналд Трамп и американскиот државен секретар Мајк Помпео.
Фаучи е најмногу загрижен дека САД ќе бидат ставени на тест наесен и во зима од втор бран на COVID-19, ако земјата не ја сузбие инфекцијата до лето.
„Треба да се засрамиме ако немаме доволно тестови до тогаш, ако се случи втор можен бран на вирусот“, вели тој. „Не мислам дека има шанси вирусот да исчезне сам по себе. Ќе биде тука и ако добие можност, ќе се активира повторно“, смета тој.
