Македонија ќе мора да почека некоја друга шанса за настап на светската фудбалска сцена бидејќи вечерва со 2:0 загуби во Порто во решавачкиот натпревар за пласман на Мундијалот во Катар откако Бруну Фернандеш искористи две наши грешки.
За разлика од натпреварот во Палермо селекторот Милевски направи промена во формациската поставеност решавајќи се за 4-4-2 наместо 4-3-2-1, а замени и двајца играчи бидејќи Елмас и Костадинов се вратија по суспензијата (на сметка на Чурлинов и Николов). Натпреварот го почна со Столе Димитриевски помеѓу стативите, во одбраната лево Езџан Алиоски, десно капитенот Стефан Ристовски, на централните бековски позиции Висар Муслиу и Дарко Велковски, во средината Енис Барди, Аријан Адеми, Елиф Елмас и Тихомир Костадинов, а во нападот Александар Трајковски и Милан Ристовски.
Португалија доминираше кога станува збор во поседот на топка, иако јасно се виде дека Македонија на овој натпревар не е ориентирана кон тотална дефанзива бидејќи често се обидуваше да напаѓа.
Првата шанса ја имаше Бруну Фернандеш во 13. минута кога по едно нафрлување се обиде со глава, но над голот. Во наредната минута Кристијано Роналдо имаше одлична можност кога излезе сам пред Димитриевски од левата страна, ја бараше подалечната статива, но за среќа промаши за малку.
Следуваше обид на Алиоски кој заврши во еден домашен играч и изнуди корнер. Барди мораше и по втор пат да изведува бидејќи Португалија одлично бранеше. За потсетување, Македонија во Палермо не изведе ниту еден удар од аголот.
Се играше 32. минута кога „Рисовите“ комбинираа на средината, а Португалците играа пресинг. Таквата игра го натера капитенот Ристовски да бара излез враќајќи назад полувисоко, Фернандеш пресече и веднаш додаде до Роналдо, овој одлично одигра и му сервираше во празно на Фернандеш за водство од 1:0.
Тој неочекуван гол по наша грешка малку како да ги блокираше македонските фудбалери па Португалија до полувремето ја контролираше играта. Се закани преку Диогу Жота и Жуау Мотињу, но првиот биеше крај голот, а вториот над пречката
Во вториот дел „Рисовите“ тргнаа похрабро, но Португалија се покажа како доста понадмоќна репрезентација добивајќи ги дуелите пред својот шестнаесетник и на тој начин не дозволувајќи да се создаде сериозна шанса по голот на Диогу Кошта.
65-тата минута беше во тек кога Македонија беше во напад кој ветуваше, но Барди претера со топката, го загуби дуелот со Пепе, а Португалците поитаа во контра која заврши со гол на Фернандеш од прва, негов втор на натпреварот. И овој гол падна по наша грешка.
Водството од два гола се покажа како недостижно, па до крајот освен некои јалови и неконкретни обиди на „Рисовите“ не видовме ништо друго, а Португалците тактички ја умртвуваа играта.
Португалија патува во Катар, а Кристијано Роналдо сепак ќе има можност да го игра својот петти Мундијал и со тоа да влезе во легендите.