Иако италијанскиот Ferrari веќе почна со развој на својот прв електричен модел, тој сепак не е дел од новиот петгодишен план, (2018-2022), на Fiat Chrysler Automobiles (FCA) групацијата.
Првиот човек на Ferrari Серџо Маркионе јасно ја искажа својата омраза кон EV технологијата, иако тој претходно изјави дека ако има електричен суперавтомобил, првиот таков ќе биде токму модел на Ferrari, сепак јасно е дека наскоро нема да видиме Ferrari на електричен погон.
Маркионе и покрај тоа, не ја исклучи во целост можноста за електрично Ferrari во петгодишниот план на групацијата, но истакна дека електричните возила се уште не се релевантни за компанијата, додавајќи и дека конкурентот Lamborghini нема да понуди свој електричен модел пред 2026 година.
Додека го чека одговорот на пазарот, кога станува збор за електричните суперавтомобили, Ferrari ќе се концентрира на производство на модели на хибриден погон, а Маркионе истакна дека во компанијата и понатаму размислуваат за тоа какви модели ќе имаат.
Првиот модел од оваа компанија на хибриден погон би требало да дебитира на саемот на автомобили во Франкфурт веќе следната година.
Претходните неколку недели Ferrari го тестираше својот хибриден погон на моделот 488 GTB.
Во меѓувреме, конкуренцијата веќе со голема пареа работи на производство на свои електрични суперавтомобили.
Па така, веќе следната година се очекува да излезе Porsche Mission E, додека Tesla новиот Roadster, кој од 0 до 100 километри на час забрзува за 1,9 секунди ќе го претстави во 2020 година.