Засега не се планираат дополнителни мерки за справување со ширењето на COVID-19 во однос на работата на угостителските објекти и групирањата преку ден на јавни простори, во паркови и на игралишта.
Министерот за здравство Венко Филипче во изјава за медиумите кажа дека за работата на угостителските објекти има протоколи што треба да се спроведуваат, како и ограничувања за групирањата на јавни простори.
Тој го пренесе апелот на Комисијата за заразни болести до инспекторатите да ги интензивираат контролорите за почитување на мерките.
„Засега не се предвидени нови рестриктивни мерки за угостителите, можно е и тоа да се случи. За угостителските објекти има протоколи и сè што треба е да се почитуваат. Инспекоратите и Комисијата за заразни болести апелираа, свесни се дека се на терен и под притисок, но колку може таа работа да се интензивира во смисла на контрола и проценка дали се почитуваат препораките или не“, рече Филипче.
Според него, угостителските објекти работат со протоколи кои се сосема доволни и се врз основа на стандардните принципи за спречување на ширењето на болеста.
За групирањата на игралиштата и јавните простори, министерот за здравство рече дека исто така нема нови мерки, но потенцираше дека сите инспекторати сега имаат зголемени ингеренции и оти со интензивна работа сите тие протоколи може да се контролираат.
Комисијата за заразни болести предложи од среда во земјава да се воведе полициски час од 22 до 5 часот наутро за да се спречи ширење на новиот бран на COVID-19.
Освен ова засега други мерки, како викенд карантини и други рестрикции не се предвидени. Бројките на заразени со COVID-19 се зголемуваат во Скопје, Куманово, Прилеп.
