Министерот за здравство Венко Филипче упати апел до граѓаните да не се групираат на масовно славење на претстојните слави и празници.
„Славите и празниците кои се пред нас, оваа година да ги прославиме само со најблиските. Следниве неколку месеци се најинтензивни во ширењето на COVID-19. Токму поради тоа, потребна е нашата максимална одговорност за сопственото здравје, но и грижа за здравјето на нашите најблиски. Во наредниот период, да не се групираме по домовите и да си помогнеме сите заедно побрзо да излеземе од корона кризата. Сега е потребно да ги почитуваме мерките за заштита, а наредната година ќе прославиме согласно традицијата. Помогнете ни, за сите нас“, напиша Филипче на Facebook.
Бројот на активни случаи на COVID-19 во државава достигна 14.661, откако вчера беа регистрирани уште 1.285. Ширум клиниките и болниците се хоспитализирани над 900 лица.
Како што информираа вчера од Министерството за здравство, новозаболените 1.285 се од направени 3.404 тестирања. Битката со вирусот ја изгубија уште 14 лица, а оздравеа 176. Од новорегистрираните најмногу – 522 - се во Скопје, каде има и најмногу активни случаи – 6.732.