Финската влада ќе им додели поддршка вредна скоро милијарда евра на компаниите кои се економски погодени од избивањето на пандемијата со коронавирусот, изјави министерот за економија Мика Линтила.
Претходно, финската Влада ги поддржа кредитите и ги упати компаниите на инвестициони фондови, но новиот износ ќе биде директна поддршка за ублажување на ненадејниот пад на приходите на компаниите, изјави Линтила на прес-конференција.
„Со новата поддршка сакаме да спречиме бран на банкроти и губење на работни места. Целта е да се промовира брзо закрепнување на компаниите од корона-кризата и да се избегнат отпуштања на работниците“, наведе тој во изјавата.
Минатата недела Владата одлучи да одобри директна финансиска помош за рестораните, а сега министерот рече дека новата поддршка ќе биде за сите компании. Предуслов за добивање помош ќе биде јасниот пад на приходи на компаниите предизвикан од избивање на коронавирусот.
Компаниите парите ќе можат да ги трошат за фиксни трошоци како плаќање на кирии или за исплата на плати. Во Финска досега се регистрирани 6.236 потврдени случаи од кои 4.300 се целосно закрепнати. Има 290 смртни случаи како последици од COVID-19, а направени се 137.000 тестирања.
Децата од денес се вратија во градинките и основните училишта бидејќи Владата почна да ги ублажува мерките за ограничување.