УЕФА ЛИГА НА НАЦИИ 2022/23

Франција, Италија и Англија: Една победа во 12 натпревари

Светскиот шампион Франција, европскиот првак Италија, како и финалистот од последното ЕУРО, фудбалерите на Англија, заедно имаат само една победа по четири кола од новата сезона на Лигата на нации.

Овие три престижни репрезентации се дефинитивно најголемото разочарување досега на елитната лига од новата сезона во Лига на нации, а единствената победа ја оствари Италија на домашен терен против Унгарија со 2:1, додека унгарските фудбалери засега се сензација бидејќи водат во група каде се придружувани од великаните Германија, Италија и Англија.

Севкупно, актуелните светски шампиони и двата финалиста од последното ЕУРО имаат 1 победа, 6 нерешени и 5 порази. Јасно е дека овие репрезентации многу комбинираа и тестираа различни тактики во играчкиот кадар во текот на јуни, но тоа го направија и останатите репрезентации.

Поразително е и тоа што во елитната Лига А само Франција, Англија и Велс се без победа по четири кола. Исто така, Англија за 360 минути постигна само еден гол, и тоа оној на Хари Кејн од сомнителниот пенал против Германија, што ги прави Англичаните убедливо најслабиот напаѓачки тим во елитната Лига на нации.

Овие три репрезентации лошо работеа до последното коло, а потоа се доби уште погрд впечаток за нив. Франција за прв пат во историјата загуби од Хрватска, а еден од најлошите порази во историјата го претрпе Англија синоќа кога загуби со 0:4 дома против Унгарија, додека Италија загуби со 5:2 од Германија. Сепак, Италијанците до 78. минута губеа со 5:0.