Баскиецот никако не добива повик од Дидје Дешам, па одлучи среќата да си ја побара преку границата и да ги брани боите на Шпанија.
Неговата татковина Баскија е поделена помеѓу Франција и Шпанија. Ајмерик Лапорт не може да игра за баскиската репрезентација, но може да бира помеѓу Франција и Шпанија. Роден во Франција, тој има настапувано за сите младински категории на „Галските петли“, но во сениорската репрезентација никако да припари. Месецов ќе полни 27 години и веќе му се смачи од чекање.
Како што пренесува Marca, дефанзивецот, кој годинава е стандарден во редовите на Манчестер Сити, веќе добил зелено светло од шпанскиот селектор Луис Енрике кој, пак, побарал од Кралската фудбалска федерација на Шпанија да се заангажира и да отпочне процедура за промена на спортски пасош кај ФИФА.
Лапорт ги исполнува сите услови на ФИФА за промена на репрезентација: нема ниту еден настап на сениоско ниво за Франција, а има живеено и повеќе од неопходните 5 години во Шпанија бидејќи 8 години живееше во Билбао играјќи за Басконија и Атлетик. Иако роден во Франција, се квалификува да игра за Атлетик бидејќи е етнички Баскиец, а како што е познато клубот дозволува само Баскијци да го носат неговиот дрес.
