Граѓаните на Франција ќе заминат на годишен одмор летово во текот на јули и август, нагласи премиерот Едуар Филип и објави пакет вреден 18 милијарди евра наменет за спас на домашниот туризам.
– Она што е добро за туризмот е често добро и за Франција, она што го погодува туризмот ја погодува Франција, сумираше премиерот Едуар Филип во презентирањето на неговиот план.
Во секторот за туризам во моментов во државата има околу два милиона вработени, сите од нив сега се наоѓаат на режимот на парцијална невработеност.
Рестораните би требало да отворат во зелените зони (таму каде вирусот е под контрола) на Франција на 2 јуни, но точниот датум ќе биде соопштен на 25 мај, а државната помош за претпријатијата од туристичкиот сектор ќе продолжи до крајот на 2020.
– Французите ќе можат да одат на одмор во јули и август, во Франција или во прекуокеанските департмани на земјата, најави премиерот. Сепак, тој додаде дека „нема многу сигурност за оваа прашање“.
Тој, исто така вети, во договор со професионалци во овој сектор, „целосно враќање на парите од резервациите на Французите во случај на откажување на нивната резервација поврзана со COVID-19“.
За заминување на летен одмор во странство или во Шенген зоната ќе треба да се почека на нова одлука.
И доколку навистина на Фрнацузите не им биде дозволено летување надвор од Франција, не мора многу да се грижат. Франција има територии низ целиот свет, па така нејзините жители ќе можат слободно да одат на одмор во Француска Гвајана (Јужна Америка), Свети Пјер и Микелон (Атлантски Океан), островите Гваделуп, Мартиник, Свети Мартин и Свети Вартоломеј (Карипско Море), Француска Полинезија, Нова Каледонија, Валис и Футуна, Клипертон (Тихи Океан), Реинион, Мајот и Расеани Острови (Индиски Океан).
