Стратегот на Аталанта не бираше зборови за да го нападне ВАР системот, нарекувајќи го „опасна алатка која влијае на резултатите“.
ВАР беше воведен во Серија А од сезоната 2017/18 со цел да даде сигурност дека судиите ќе носат висрински одлуки на теренот за време на натпреварите.
Зборувајќи за Sky Sports Italia, Џан Пјеро Гасперини го изнесе својот гнев кон ВАР и желбата тој да се укине.
„Случајот со Малиновскиј е само последниот од многуте. Сѐ уште сум лут, ВАР стана многу опасна алатка која влијае на резултатите. Нажалост, се користи при ситуации кои се кристално јасни и кои потоа се извртуваат“, почна тој.
„Веќе не се разбира кога одлучуваат судиите, а кога ВАР. Тоа прави да имаме негативно мислење, што е лоша работа, најлошото нешто што може да му се случи на фудбалот“.
„Се надевам дека англиските навивачи, кои ја срушија Суперлигата, исто така ќе го уништат и ВАР системот, кој е алатка која доколку се употребува лошо создава поголема опасност за самиот фудбал“, заврши Гасперини.
Откако се воведе ВАР навистина е намален бројот на судиски грешки, како голови од офсајд, недосудени пенали, досудени пенали без основа, црвени картони, како и игра со рака. Но, ВАР покажа и мани, бидејќи сепак зад ВАР стојат други судии кои преку монитори донесуваат одлуки, кои понекогаш можат да бидат и погрешни - што и се случува. Сепак, нивните одлуки не се конечни, туку му се сугерираат на главниот судија, кој е на терен, а тој потоа одлучува дали ќе ги прифати или не (освен за офсајд каде одлуката на ВАР е конечна).
Системот ВАР денес се користи во многу првенства ширум светот, како и на Мундијалите и континенталните првенства.
