Рускиот енергетски гигант Газпром сака засега да користи делови од руско-германскиот гасовод Северен тек 2, кој е ставен во мирување, за снабдување на сопственото население.
Со оглед на тоа што гасоводот во Балтичкото Море во моментов не се користи, Газпром одлучи да ги „искористи вишокот руски транспортни капацитети на копно за развој на снабдувањето со гас во регионите во северозападниот дел на Русија“, соопшти компанијата.
Пораката, објавена на Telegram профилот на компанијата, содржи и предупредување до Берлин: „Доколку Германија сепак одлучи да го пушти во употреба Северен тек 2, најмногу првиот дел од подводната рута би можел да биде поврзан во блиска иднина. Вториот крак сега нема да се користи пред 2028 година“.
Гасоводот Северен тек 2 има два крака, секој со транспортен капацитет од 27,5 милијарди кубни метри гас годишно.
По руската инвазија врз Украина, Берлин целосно го запре процесот на сертификација, кој претходно беше суспендиран. Во новата енергетска стратегија се планира значително да се намали зависноста на Германија од рускиот гас.
