Српскиот тенисер Новак Ѓоковиќ во утринските часови пристигна во Дубаи откако беше депортиран од Австралија каде се обиде да настапи на првиот Грен слем турнир сезонава.
Ситуацијата со Ѓоковиќ конечно доби расплет, вчера Федералниот суд на Австралија му ја одби жалбата и повторно ја поништи визата за престој во земјата.
Тоа значеше дека тенисерот мора да биде депортиран, а по 14 часа лет од Австралија, Ѓоковиќ пристигна во Обединети Арапски Емирати од каде пред 12 дена патуваше во обратен правец за Мелбурн.
Од Дубаи Ѓоковиќ ќе се префрли во авион за Белград. На аеродромот го дочекаа обожаватели кои сакаа да се фотографираат со најдобриот тенисер во светот.
Ѓоковиќ, и покрај проблемите кои ги имаше деновиве, беше насмеан и расположен и позитивно одговори на желбите на обожавателите.