Манчестер Сити го победи Саутемптон со 5:2 на синоќешниот натпревар во Премиер лигата, но во центарот на вниманието повторно беа судењето и ВАР технологијата.
При резултат од 1:1, Фил Фоден му ја украде топката на голманот на Саутемптон, Алекс Мекарти, кој го сопна и го спречи да ја втурне топката во празната мрежа. Сепак, Фоден не сакаше да падне, па затоа брзо се исправи, но дотогаш гостинската одбрана веќе беше поставена и акцијата пропадна. Бидејќи контактот меѓу Мекарти и Фоден беше очигледен, англиските медиуми се согласија дека судијата Џонатан Мос требаше да досуди пенал, а Пеп Гуардиола се согласува.
„Не разбирам зошто беше поништен голот на Фулам против Тотенхем. Не ги разбирам игрите со рака од натпреварите на Арсенал и Барнли. Не го разбирам ниту овој недосуден пенал денес. Мос не може да го види тоа, но има ВАР, неверојатно е што не досудија пенал. Веќе четири или пет години не се жалам на судењето, ама ова е навистина неверојатно. Неверојатно!“, рече тој со неверување.
На крајот Сити запиша три бода, па грешката на судијата не беше одлучувачка.
„Ако изгубевме со 5:2, немаше да коментирам ништо, бидејќи луѓето би го протолкувале како изговор. Сега победивме за да можам да кажам што мислам. Ова е неверојатно. Можеби еден ден и на тренерите, и на играчите ќе ни ги објаснат ВАР правилата и што се случува таму. Морам да кажам дека сум горд на Фоден и неговата чесност“, заклучи Гуардиола.