Напаѓачот на Милан е во составот за претстојните квалификациски натпревари, пет години по неговото повлекување од репрезентацијата.
За Златан Ибрахимовиќ времето како да почна да оди наназад. Откако играше во МЛС, лига која сите ја користат како последен чекор пред пензија, тој се врати во Европа и тоа не било каде туку во Серија А и Милан, а сега направи уште еден чекор назад кон подмладувањето: повторно е репрезентативец.
Ибра претходно играше за Шведска од 2001 до 2016 година кога после разочарувачкиот настап на ЕУРО 2016 реши да се повлече. Одигра 112 натпревари на кои постигна 62 гола. За можно враќање се шпекулираше за Мундијалот во 2018, но селекторот Јане Андерсон тогаш одлучи дека Ибра повеќе не е потребен. Сега, очигледно, се примисли.
Златан сам го потврди враќањето и тоа во свој стил, на Twitter објавувајќи: „Враќање на Бог“.
Шведска на 25 март ги отвора мундијалските квалификации дома против Грузија, а три дена подоцна гостува кај Косово. Потоа на 31 игра пријателски натпревар дома со Естонија.
Доколку Ибра настапи барем на еден од трите натпревари, а тоа сигурно ќе се случи, ќе стане и најстариот играч кој заиграл за Шведска надминувајќи ги легендите Томас Равели и Хенрик Ларсон кои настапија на 38-годишна возраст. А, пак, доколку постигне и гол ќе го сруши и рекордот на Гунар Грен поставен во далечната 1958 година кога постигна два гола на 37 години во ремито 4:4 против Данска.
Јасно е дека штом Ибра сега се враќа, ќе го гледаме и на претстојното ЕУРО на кое Шведска е во групата Е заедно со Шпанија, Полска и Словачка.