Легендарниот Златан Ибрахимовиќ синоќа го одбележа почетокот на 74. издание на популарниот италијански фестивал „Санремо“ кога на сцената се појави во ритамот на познатиот хит на Лепа Брена.
Самото појавување на светски популарниот фудбалер во салата „Аристон“ предизвика големо внимание, а во позадина се слушаше музиката од песната „Luda za tobom“ на Лепа Брена.
Инаку, ова не е првпат Ибра да гостува на „Санремо“ бидејќи прв пат се појави пред три години, а тогаш на сцената се појави во ритамот на песната „Jutro je“ на пејачката Нада Топчагиќ.
Швеѓанецот не е првиот фудбалер кој гостува на „Санремо“, бидејќи пред него на овој фестивал гостуваа имиња како Роберто Баџо, Франческо Тоти или Антонио Касано.
Ибрахимовиќ се пензионираше на крајот од минатата сезона, а неодамна стана виш советник во Милан. Во својата кариера настапуваше за неколку врвни европски клубови, а се одлучи и за американска авантура со Лос Анџелес Галакси. Во целата своја кариера одигра 827 натпревари на кои 496 пати ја погоди мрежата и 204 пати асистираше.
