Денеска од 18 часот на програмата е Дерби дела Мадонина, вечниот дуел меѓу градските ривали Интер и Милан.
Веројатно најсликовитото дерби на Стариот континент овој пат ќе биде без препознатливите кореографии на навивачите, нагласува спортскиот новинар на Kajgana.com, Филип Здравески, во најавата за фудбалскиот викенд со дури шест дербија.
Коронавирусот безмилосно напредува низ целиот свет, а не се поштедени и фудбалерите и покрај строгите мерки за заштита. Ова популарно дерби го обележа големиот број на фудбалери заразени со коронавирусот и во двата табора.
Во изолација беа дури и тренерите Антонио Конте и Стефано Пиоли, па имаа само еден тренинг за да се подготват за дербито, но со преполовени екипи.
Во Интер беа заразени Алесандро Бастони, Милан Шкринијар, Роберто Гаљардини, Раџа Наинголан, резервниот голман Андреј Раду и Ашли Јанг, Стефано Сенси е суспендиран, а Алексис Санчес е повреден.
Покрај тренерот Конте, во изолација беа и Андреа Ранокија, голманите Самир Хандановиќ и Даниеле Падели и новајлијата Матео Дармјан.
Слична ситуација во тимот на Милан. Повредени се Анте Ребиќ и бекот Андреа Конти, како и двајца искусни стопери – Матео Мусакио и Алесио Ромањоли.
Лео Дуарте уште е позитивен, како и младиот Матео Габија која се зарази за време на собирот со репрезентацијата.
За среќа на Миланезите, Златан Ибрахимовиќ се опорави од коронавирусот и ќе може да настапи.
Натпреварот се игра со почеток во 18 часот, а ќе го суди Маурицио Маријани.
Во центарот на вниманието сигурно ќе биде напаѓачот на „Росонерите“, Златан Ибрахимовиќ, кој своевремено играше за „Нераѕурите“.
Закрепна од коронавирусот и беше многу расположен на еден од последните тренинзи пред дербито.
Тој се бореше за време на загревањето со младиот Даниеле Малдини, синот на легендата Милан, Паоло Малдини.
Во пресрет на дербито, Милан беше изедначен на врвот на табелата во Серија А со Аталанта по три победи на почетокот на сезоната.
Од друга страна, Интер е петти, но со само два бода помалку од градскиот ривал, по ремито со Лацио (1:1) во последното коло.
Интер го победи Милан на последните четири натпревари, и го нема изгубено градското дерби од јануари 2016 година и четвртфиналето од Копа Италија.
Дерби дела Мадонина ќе се игра по 195. пат, Интер има 74 победи, Милан 62, а 58 пати играле нерешено.
