Златан Ибрахимовиќ после пет години повторно го облече жолтиот дрес на репрезентацијата и вели дека тоа чувство му причинило неверојатно задоволство.
Ибра се најде во почетните единаесет на синоќешниот натпревар против Грузија кој се одигра на „Френдс Арена“ стадионот во Солна во рамките на 1. коло од групата Б во мундијалските квалификации.
„Чувствував пеперутки во стомакот. Без притисок, само возбуда. Тоа беше убаво чувство“, вели Златан говорејќи за La Gazzetta dello Sport.
„Се боревме храбро, бевме обединети, но нешто ни недостасуваше. Можеби покажавме премногу почит кон Грузија. Не беше лесен натпревар, но ги освоиме трите бода“, продолжи тој.
Можеби не постигна гол, но одличната асистенција е половина гол. Погодокот на Класон е на Ибра, кој одлично му асистираше.
„Класон беше блиску до мене. Ми довикна 'Зад тебе сум, Златан!' и знаев каде се наоѓа, па ја исконтролирав топката и му ја додадов“, го опиша решавачкиот момент на натпреварот.
„Беше возбудливо враќање, но сега треба да продолжиме. Можеме да се подобриме само доколку се држиме заедно и што подобро да се запознаваме“.
Нажалост, враќањето на Ибра во националниот дрес се случи пред празни трибини поради пандемијата со коронавирусот.
„Ни недостасуваат навивачите. Се справувам со тоа, навикнат сум да играм без навивачи, но ми фалат. Сакаме да го имаме шведскиот народ зад нас. Тие ни се од голема помош“, заврши легендата.
По натпреварот, Ибра на Twitter објави фотка како го прославува голот со Класон на која напиша „Карл XVII Густаф“, преправајќи се дека е наследник на шведскиот крал Карл XVI Густаф и потоа во свој стил коментираше: „Ова се стариот крал и новиот крал“.
Наредниот натпревар на Шведска е внедела вечер кога му гостува на Косово во Приштина.
