Сопственикот на Tesla, Илон Маск, коментирајќи ја веста на Twitter за зголемувањето на продажбата на Tesla автомобилите во Хрватска, напиша дека Никола Тесла е роден во Хрватска, од српски родители.
„Никола Тесла е роден во Хрватска од српски родители“, напиша Маск.
Неговиот коментар собра над 11.000 лајкови, а твитот ги раскара Хрватите и Србите. Некои коментираат дека Тесла е роден во Австроунгарија.
Никола Тесла е роден на 10 јули 1856 година во Смилјан, како дете на локален свештеник на Српската православна црква Милутин Тесла, на подрачјето на тогашна Австрија, денес Република Хрватска.
Во периодот од 1881 до 1882 работел во Будимпешта во Централната телеграфска канцеларија и токму таму започнал со пронајдоците, го усовршува апаратот за засилување на гласот кај телефоните.
Кон средината на 1882 година заминал во Париз, па во 1884 година пристигнал во САД каде работел и живеел до крајот на животот. Починал на 7 јануари 1943 година во Њујорк.
