Јапонски супербрз воз денеска беше принуден да изврши вонредно застанување бидејќи патничка пронашла змија меѓу две седишта, пренесуваат локалните медиуми.
Една патничка забележала змија долга 30 сантиметри во просторот меѓу две седишта во возот што сообраќал на патот меѓу Токио и Хирошима. Возот бил запрен, а на местото на настанот дошла полиција која се погрижила за неочекуваниот гостин.
Се верува дека змијата не била отровна, а нема информации за повредени. Полицијата трага по сопственикот на змијата, односно по оној кој ја внел.
И покрај застанувањето возот успеал да стигне на време во Хирошима. Овие супербрзи возови застануваат единствено во случаи на големи инциденти како земјотрес или самоубиство.
