Индиското вселенско летало Chandrayaan-3 лета кон површината на Месечината пред нејзиниот историски обид за слетување, правејќи неверојатни снимки попатно.
Вселенското летало треба да го започне спуштањето кон површината на Месечината денеска околу 14 часот и 15 минути по македонско време. Доколку успее, Индија ќе биде првата вселенска сила која ќе изврши меко слетување на Јужниот пол на единствениот природен сателит на Земјата.
Доколку биде успешна, оваа мисија ќе го означи првото контролирано слетување на индиско вселенско летало на површината на Месечината и ќе ја направи Индија четвртата земја што некогаш постигнала таков подвиг. Во моментов, Соединетите Американски Држави, Кина и поранешниот Советски Сојуз се единствените нации кои извршиле контролирано слетување на вселенски летала на Месечината.
Индиската организација за вселенско истражување (ISRO) вчера објави серија фотографии и снимки направени од камерите на вселенското летало. Еден поглед од птичја перспектива на Месечината е направен од 70 километри над површината на Месечината. Друга слика, направена на 20 август, нуди крупен кадар на правливиот сив терен на Месечината.
Chandrayaan-3, што значи „месечево возило“ на санскрит, беше лансирана од вселенскиот центар Сатиш Даван во Шрихарикота во јужната индиска држава Андра Прадеш на 14 јули. Леталото полека се приближува до површината на Месечината. Оваа мисија го означува вториот обид на Индија за контролирано слетување на Месечината. Првиот обид, во 2019 година со Chandrayaan-2, заврши со пад на леталото на површината на Месечината поради софтверски проблеми и тешкотии при сопирање при спуштање.
Индиската јавност трескавично го очекува слетувањето, а медиумите го одбројуваат времето до слетувањето. Се одржаа молитви во храмовите, џамиите и црквите во земјата, при што учениците мавтаа со индиската тробојка додека чекаа проекции на слетувањето во живо.
Премиерот Нарендра Моди ќе го набљудува слетувањето од Јужна Африка, каде што присуствува на тековниот самит на БРИКС, објавија медиумите.
Нерамниот терен го отежнува слетувањето на Јужниот пол, а првото слетување би било историско. Водениот мраз во регионот може да обезбеди гориво, кислород и вода за пиење за идните мисии.
Да потсетиме, на 20 август руското летало Луна-25 се урна на површината на Месечината и се загуби.
„Според прелиминарните пресметки, Луна-25 се префрли на непредвидена орбита и се судри со површината на Месечината“, објави Роскосмос, кој објави „ненормална“ ситуација на вселенското летало еден ден претходно откако беше испратен сигнал од Земјата што требаше да започне процес на подготовка на леталото за слетување на површината на Месечината.
Неуспехот на престижната мисија го нагласува падот на Русија како вселенска сила од Студената војна кога Москва го лансираше првиот сателит во вселената Спутник 1, а советскиот космонаут Јуриј Гагарин стана првиот човек во вселената. Русија нема лансирана лунарна мисија од Луна-24 во 1976 година кога Леонид Брежњев владееше со Кремљ.
