Познатиот актер и холивудски миленик Киану Ривс реши да ја искористи неговата популарност за добра цел, по којзнае кој пат.
Тој нуди состанок преку апликацијата Zoom со обожавател (или обожавателка) кој ќе донира најмногу пари за добротворна организација.
Ѕвездата на „John Wick“ и „Matrix“ се здружи со добротворната организација Camp Rainbow Gold од Ајдахо која им помага на деца болни од рак. Обожавателот со највисока донација за организацијата ќе добие 15-минутен онлајн состанок со актерот.
„Bill & Ted. Speed. Matrix. John Wick. Го знаете. Го сакате. Ова е навистина непроценливо и сега имате можност да разговарате со него од удобноста на вашиот дом“, стои во описот на конкурсот.
Фановите добија инструкции да ги подготвар однапред своите прашања за „пријатен разговор“ со 55-годишниот актер.
Виртуелната парична понуда за овој разговор беше проценета на 10.000 долари, но анонимен наддавач веќе ја зголеми на 16.600 долари.
Аукцијата ќе биде затворена следниот понеделник, а состанокот би се одржал во почетокот на јули.
Сите приходи собрани од кампањата „15 минути слава со Киану Ривс“ ќе бидат директно донирани во организацијата Camp Rainbow Gold.
Социјалните мрежи се преплавени од примери за тоа колку е прекрасен Киану Ривс за кого дури неодамна се дозна дека со години донира пари за детски болници, а се залага и за правата на животните и зборува за важноста на помагањето, позитивниот став и тоа да бидеме добри едни со други.