Фудбалерите на Интер синоќа ја совладаа Бенфика среде Лисабон со 2:0 во првиот четвртфинален дуел од Лигата на шампионите, и со една нога нагазија во, за нив, првото полуфинале по 2010 година.
И покрај тоа што не пружија некоја којзнае каква игра, гостите до триумфот дојдоа со головите на Николò Барела и Ромелу Лукаку, па така си обезбедија голема предност пред реваншот.
Предводникот на миланскиот тим, Симоне Инѕаги, беше особено задоволен од настапот на своите играчи, но напомена дека Бенфика не може толку рано да се отпише.
„Момците пружија сјаен перформанс преку многу труд, трчање и посветеност. Уживавме вечерва, но исто така сум свесен дека ова беа само првите 90 минути. Одлично одигравме во двете фази, не дозволувајќи му на противникот многу простор. Момците беа одлични, но реваншот никако не можеме да го земеме здраво за готово“, рече Инѕаги.
Кога Лукаку го реализираше ударот од белата точка за 2:0, од клупата за резерви заменетиот Един Џеко од преголема радост втрча на теренот за да го прослави голот со останатите. Тоа го чинеше жолт картон.
„Тоа е нормално во фудбалот, морате да бидете обединети. Во овие 18 месеци никогаш не ме имате слушнато да се пожалам на залагањето на овие момци. И натаму сме во игра во три силни натпреварувања и мораме да продолжиме“, дополни тренерот на „Нераѕурите“.
Потсетуваме, реваншот помеѓу Интер и Бенфика е закажан наредната среда од 21 часот на „Џузепе Меаца“ стадионот во Милано.