Ниту по 15 јуни Италија нема да дозволи странците од земјите што не се членки на ЕУ да влезат во земјата, најави денеска шефот на италијанската дипломатија Луиџи ди Мајо.
-Наша обврска е да ги заштитиме животите и здравјето на нашиот народ, рече Ди Мајо во интервју за телевизијата Rete 4.
Тој посочи дека, истовремено, Италија се залага слободата на патување во Европа да почне од 15 јуни.
-Франција и Германија ми ветија дека слободата на патување за европските граѓани ќе биде загарантирана од 15 јуни, рече Ди Мајо.
Шефот на италијанската дипломатија денеска ќе биде во Берлин, како што е најавено, каде ќе се сретне со германскиот министер за надворешни работи Хеик Мас.
Ди Мајо изрази надеж дека Италија ќе може да ја убеди Австрија да ги отвори своите граници за неговата земја.
-Австрија не е загрижена за Италија, туку само за одредени региони. Ние со факти ќе се бориме против оваа загриженост, рече тој.
Австриската Влада вчера ги отвори своите граници и од полноќ ги укина мерките за карантин за сите соседи, освен за Италија.
