По неколку децении, човештвото се подготвува да се врати на Месечината и планира да воспостави потрајно присуство на површината на Месечината.
Американската вселенска агенција активно бара технолошки решенија за да изгради безбедно засолниште за идните астронаути додека ја истражува можноста за долгорочни населби. Сега француско-италијанскиот стартап Thales Alenia Space има намера да произведе лунарен модул наречен Multi-Purpose Habitat (MPH), кој би можел да стане првата постојана станица на Месечината. Стартапот потпиша договор со Италијанската вселенска агенција (АСИ) за да започне со дизајнирање на овој модел на домување.
„MPH ќе означи историска пресвртница и ќе стане првиот италијански модул погоден за живеење што работи на површината на Месечината. Горди сме на нашата компанија, која има уникатни технички и организациски вештини за да ги надмине предизвиците од овој вид“, рече Франко Фенољо, раководител на човечки планетарни истражувања и роботика во Thales Alenia Space.
Во средината на октомври, MPH го усвои прегледот на НАСА со кој се утврди дека ги поседува „клучните функционалности“ потребни за површината на Месечината во рамките на програмата Artemis. Целта на оваа програма е да се воспостави одржливо човечко присуство на Месечината како основа за идните мисии на Марс.
Стартапот сега се подготвува за следниот чекор, кој вклучува завршување на преглед на концептот на мисијата (MCR). Оваа фаза треба да биде завршена во првиот квартал од 2024 година и мора да биде во согласност со пропишаните барања на агенциите АСИ и НАСА.
„Тоа ќе биде клучна пресвртница за напредокот на проектот во следните фази на критички технолошки дизајн и развој на модули“, се вели во соопштението.
НАСА и АСИ ги здружија силите во 2020 година на програмата Artemis.
Воспоставувањето на лунарно живеалиште претставува бројни предизвици, особено кога се зема предвид суровата месечева средина и недостатокот на критични ресурси за опстанок на астронаутите.
Затоа, развојот на лунарното живеалиште бара обезбедување на основни решенија за одржување на животот, дури и за кратки престои од 7 дена. Потребно е да се заштитат жителите од високото ниво на вселенско зрачење, екстремниот студ на лунарната ноќ и продорниот реголит. Долготрајната изложеност на овие екстремни елементи може да доведе до сериозни здравствени ризици за истражувачот. Ова ја нагласува огромната одговорност за дизајнирање на технолошки напреден и безбеден модул. Компанијата сака да испорача „безбеден, удобен и мултифункционален модул за астронаутите“.
Лансирањето на модулот не се очекува пред 2030-тите.
