Претседателот на државата Ѓорге Иванов денеска во традиционалното годишно обраќање пред пратениците во македонското Собрание, побара од парламентрарното мнозинство да смогне сили и да го отфрли Договорот од Преспа.
„Сѐ уште се надевам дека ова парламентарно мнозинство ќе смогне сила и ќе го послуша гласот на народот и ќе ја отфрли преспанската спогодба и амандманите за промена на Уставот“, рече претседателот Иванов од говорницата во македонското собрание, во обраќањето на кое присуствуваа премиерот Зоран Заев, спикерот Талат Џафери, министри во Влдата, претставници на судската власт, на АРМ, на верските заедници и дипломатскиот кор.
Шефот на државата во своето последно годишно обраќање зборуваше и за гаранциите за премиерот Заев.
„Нема ден, а некој да не ме праша зошто ги прифатив, а уште повеќе зошто не ги активирав гаранциите на Заев за да му го дадам мандатот. Мојот одговор е дека со неговиот потпис на тие писмени гаранции јас ставив вето на законот за употреба на јазиците и законот за ратификација на спогодбата од Преспа. Со тоа, гаранциите се активирани. А активирани се бидејќи сме соочени со апсурд“, порача претседател Иванов од собраниската говорница.
Тој посочи дека според последните истражувања, мнозинството млади сметаат дека Македонија се движи во погрешна насока и дека тоа не треба да никого да изненадува, бидејќи, како што рече станавме држава во која се започнува наопаку.
„Прво се побара поддршка од граѓаните на избори, а дури потоа им се соопшти дека всушност гласале за Тиранска платформа и грчка спогодба. Прво се донесе закон за употреба на јазиците, а дури потоа се најави дека ќе се побарало мислење од Венецијанската комисија. Прво се апсеа пратеници, а дури потоа им се симнуваше пратеничкиот имунитет. Прво се прифати спогодба за името, а дури потоа бев информиран како Претседател на државата. Прво се донесе таа штетна грчка спогодба, а дури потоа граѓаните беа прашани на референдум“, нагласи Иванов, дополнувајќи и дека власта прво се согласила на промена на Уставот, а потоа изнудува 2/3 мнозинство, и тоа преку уцена на пратеници, рече меѓу другото Иванов, во говорот кој беше поздравен со аплаузи од опозицијата во парламентот.
Но, кога неговото обраќање беше прекинато од гласни коментари на пратеници на власта, Иванов им се обрати со зборовите:
„Покажете си го нивото на политичка култура пред целиот дипломатски кор.“
И додаде: „Јас ве слушав цела година, барем сега, еднаш, сослушајте ме вие мене. Ајде смирете се. Ајде вашите лични фрустрации потиснете ги!“
