Израелската влада денеска даде првично одобрување на нацрт-законот кој ќе им овозможи на судовите да наметнат смртна казна за терористички напади во кои жртви се израелски граѓани.
Одобрувањето беше дадено и покрај очекуваното противење од јавниот обвинител и наводните напори на партијата Ликуд на премиерот Бенјамин Нетанјаху да го одложи, пишува The Times of Israel.
Министерскиот комитет за законодавство го одобри предлог-законот да се стави на гласање, за кое долго време се залагаше екстремистичката партија на министерот за национална безбедност Итамар Бен-Гвир, Отзма Јехудит.
Предлог-законот наскоро ќе има прелиминарно читање на пленумот во Кнесетот, а потоа за него ќе расправа и кабинетот за безбедност, кој се верува дека ќе побара извесни измени во текстот на нацртот.
Во заедничката изјава на Нетанјаху и Бен-Гвир, се наведува дека текстот на нацрт-законот поднесен денеска предвидува дека „судовите можат да изречат смртна казна за оние кои извршиле националистички мотивирани убиства против државјани на Израел“, пренесува The Times of Israel.
